كلمات : صفاء عبد المرتضى
شـبابنا شــهداء الثــــــورة .. فتحولنا باب الحرية
لأرواحهم الغالية الطاهرة .. تعظيم سلام والف تحية
أحمد بســيوني أنا عارفاه .. أستاذ في تربية فنية
وسالي زهران تالته آداب .. سابت دروسها الجامعية
وإيهاب ع المتحف راح يجري .. يحمي آثارنا المصرية
عمرو ومحـروس وشـهيرة .. راندا ومحمود وأميرة
أســماء كتير راحت تهتف .. وتقول مظاهرة سلمية
متجمعين ســوا متواعدين .. من غير مكالمة هاتفية
إســـلام محمد قال هنزل .. أمه قالتله بلاش تنزل
يا ابني خـايفـة تتعـــــور .. معيش أجـبلك أدوية
قال يامه غلو علينا العيش.. والفول وحتى الطعمية
دي كل حاجة الغلا طالها .. وناقص الهوا والميه
ودعتله في حفظ الله يا ضنايا .. ياضي قلبي وعنيه
قناصة م الشباك رقماهم .. جوه وزارة الداخلية
تتشــل إيد اللي أزاهـم .. برصاصة وبطلقة نارية
محمد البطران ضحى .. وما كنش طالب ترقية
وكم شريف ف الهوجة خدوه .. في ظل فوضى أمنية
حبيب وعز وجرانه ورشيد..افتكروها حاجة مُسلية
الشـر جـواهم بيزيـــــد .. ولخــير بلدنـا حــــرامية
أخبارهم كلها وصلانة .. من الجزيرة والعربية
وشاشتنا كانت خجلانة ..وللحــقيقـة مخـبيــة
حسبنا الله ووكيلنا أكيد .. عليكو دعياها ولية
وإوعوا ننسى أي شهيد .. رفع الكرامة المصرية
دي روحه في السما طايره بعيد .. وربي قال رزقه عليه
شايفك يا مصر ف يوم العيد .. زغاريد وصواريخ ضوئية
يا رب صون مصر الغــالية .. وخـليها م العدو محمية
يا رب صون مصر الغــالية .. وخـليها م العدو محمية
0 التعليقات:
إرسال تعليق