لو
كلمات : صفاء عبد المرتضى
لو ينفع يوم للدنيا أرجع .. من تانى أنا كنت هصلي
وم الفلوس اللي حايشها .. ع الفقرا كان ممكن أذكي
وأترجى م الرحمن توبة .. لذنوبي اللي بعملها تملي
بدل مارينا والساحل .. عُمرتى كانت واجبة في مكة
أنا عُمري مَر وأنا غافـل .. وعِشـت ونسـيت السِـكة
لو ينفـع آكـل من تـاني .. قبليهـا أنا كنت هاسـمي
وأبر بجد أبويا وأمى .. وليهم عمرى ما كنت أعصى
لو أقدر أخرج من قبري .. هصالح كل اللي خاصمته
لو ينفع أطلع من كفني .. هـزور الرحـم اللي قاطعتـه
كان نفسى يوم للدنيا أرجع .. وأبوس راس اللي شتمته
وأحب كل الناس تاني .. وماعاديش اللي كرهته
جبال ذنوب فوق على ظهري .. مليش طاقة أتحملها
معاصي في كتابي بتشهد .. على كل حاجة أنا عامِلها
لو كنت يا لساني تبطل .. كلام فى حق اللي اغتبته
ما كنتش ذنوبي هتكتر .. وكنت لضميري عاتبتـه
عِرفت مين اللي في حقه .. غِلطت وبجهلي ظلمته
وخجلان من ربى حقيقى .. ومن وحاشة اللي عملته
سكة نجاتى في الآخرة .. في يوم ما هستنى ميعادي
يا ريتها ليّه كات كافية .. أعمالي في ميزان حسناتي
ياريتني فُقت من الغفلة .. وعرفت م الأول زادي
0 التعليقات:
إرسال تعليق