مش عارفه بس إزاي وليه ؟
كلمات : صفاء عبد المرتضى
لما كنت صغيرة كان أبويه مرتبه 90 جنيه
هوه ده اللي في الشهر كل اللي كان بيتحصل عليه
وأمي من ناحيتها كات تساعده باللي كات تقدرعليه
مرة عدس مرة بامية مش شرط يعني كل يوم ناكل فيليه
وفي مدارس حلوة علمونا لاجل مابقى مُدرسة وأخويا بيه
كنت شاطرة في دراستي .. مدياها كل وقتي
ولدروسي بانتبه جت منين وإزاي وليه؟
أسئلة دايما بقولها في الحصص لأساتذتي
عشان أفهم الدرس كله ومن جميع نواحيه
ونجحت في الثانوية العامة .. وبفضل دعاك يامه
دخلت كلية تربية .. وأكتر من كده أنا عايزه إيه
محتاجة طقم شيك ألبسه .. والتاني نص نص بس أبدل فيه
مَراجع أبحاث وكتب .. وعارفة إن المصاريف زادت عليه
كنت في الصبح اتكسف لما أقوله : يابا هات جنيه
يدهولي وهو متغصب .. ده اللي كنت بشوفه من عينيه
بعد التخرج اشتغلت في مَدرسة والحَمد ليه
أستاذة اسمي في حِتتي ده اللي بينادوني بيه
رايحة جاية بكراريس العيال الشاطرة واللي مش هيه
اجتهد في الشرح لاجل ما يحصلوا كلهم على ميه ميه
وفمعاد القبض كنت طايرة .. لما خدت أول مرة 198 جنيه
نِفسي اشتري مرة بلوزة .. وشنطة غالية من أم 45 جنيه
يخليهملك ربنا .. جملة كات بتقولها واحدة شايلة عيلها وبتشحت عليه
أحط إيدي في شنطتي .. أديها مرة ومرات ملاقيش اللي أتصدق بيه
وأنا راضية بحالي دايما .. وباللي ربنا قاسملي بِيه
وفي يوم سمعت إن ناس بتقبض في السنة بالتسعة مليون جنيه
إشاعات دي كنت بفتكر .. لحد ما اتأكدت وقالوا وفيها إيه !
ناس في مجالها بتجتهد .. تُرقص تمثل مش عارفه حتى تتورب
في بطولة تكسب ..والشعب يفرح .. مع إن مفيش حاجة هتعود عليه
من ساعتها كترت في راسي الأسئلة .. زي برضه وقت التلمذة
قوليلي بس مش عارفه إيه ؟ الفلوس دي جت منين وإزاي وليه؟؟
مش برده أكل ولبس ومكان نضيف بيعيشوا فيه
لأ يا بنت الأكل في بيوتهم حاجة تانية .. يختلف تمام عن صحن بامية
سرفيس لرومي وأوزي مشوي واسكالوب بانيه
والحلو من مونچيني أو لابوار وبلاش م الإليزيه
والهدوم لابسينها ماركة .. في البدل وف فساتين السواريه
والمكان مش أي حاجة .. علي الأقل ڤيلا فخمة أو شاليه
مبيركبوش المترو زينا .. ولا تِملى عينهم شيڤروليه
يا ناس حرام اتقو ربنا .. ده البذخ اللي هتيجو في يوم وتتحاسبوعليه .
1 التعليقات:
الأخت والكاتبة المبدعة صفــــاء عبد المرتضى
ذكرتيني أخت صفاء بمقالة لي عنوانها (الفقر ليس عيباً ولكن)
مقالة بنكهة الياسمين الدمشقي والمانجا المصرية
ما أشهى كلماتك وما أروع تصوراتك ينتابني شعور بأنك حتماً كاتبة تفرض على قلوبنا وعقولنا الحترا والتقدير لكل ما يخطه قلمك (الشيطاني) عفوا ولكنه لفظ أنا أحبه وأعرف بأك لا تحبينه ولكن قلمك الشيطاني الثائر أنا أحبه وأحترمه فقلمك شيطاني على الفاسدين يلاحق من يخالف القوانين والدساتير قلمك يفرض وجوده بكل الميادين وما زلت تحلمين بالفقراء والمستضعفين أنت حالة انسانية رائعة أخجل منك دوما عند وضعي مقال بمدونتك وأحسب لك ألف حساب أنت ثائرة من النوع الرائع وطنية من الطراز الأول شغوفة حساسة ملتزمة بكل ا يخطه قلمك الرائع قد يصيبني السحر وأنا أقرأ ما بين السطور وأنا أقدر وأحترم كل ما تكتبه أختي صفاء عبد المرتضى لك مني أختي المبدعة والكاتبة الفذة جل الاحترام والتقدير
هاشم برجاق
إرسال تعليق